Lihkku giellavahkkuin!

Geillavahkku

Dán vahkku lea sámi giellavahkku. Dainna áigot čájehit ja loktet sámegielaid. Giella ii leat dušše gulahallan- , ovttasbargo-, ovdánahttin- ja sosiála ovttasdoaibmanreaidu, giella ovddasta maid identitehta, kultuvrra, historjjá, árbevieruid ja muittuid.

Giellavahku ulbmilin lea buoridit sámegielaid stáhtusa, ja buoridit máhtu sámi giela ja kultuvrra birra olles servodagas. Juste dán vahkus galget sámegielat gullot ja oidnot juohke sajis.

Áitojuvvon gielat

Máilmmis gávdnojit, UNESCO dieđuid mielde, 6-7000 giela. Njeallje proseantta dain adnojit 97 proseanttas máilmmi álbmogis. Dat mearkkaša ahte olu gielat leat áitojuvvon go eai leat doarvái geat hupmet ja máhttet daid gielaid. Sámegielat leat maid áitojuvvon gielat. Danne lea dehálaš beassat oahppat sámegiela ja ahte sámegiella adno ja oidno almmolašvuođas. Vuođđolágas čuožžu ahte ”Lea stáhta eiseválddiid geatnegasvuohta lágidit dilálašvuođaid nu ahte sámi álbmotjoavku sáhttá sihkkarastit ja ovdánahttit gielas, kultuvrras ja servvodateallimis.” Dát mearrádus vuođđolágas boahtá olmmošvuoigatvuođain.

Guokte gulaskuddama sámegielaid birra

Jus dál leat guokte evttohusa gulaskuddamis mat goappašagat leaba sámegielaid birra. Nubbi lea sámegielaid hálddašanguovllu rievdademiid birra, mii evttohuvvo “Váibmogiela”- čielggadeamis (2016). Giellahálddašanguovllus leat sierra eavttut sámegiela geavaheapmái ja ovdánahttimii. Guovllus lea earret eará riekti oažžut vástádusa sámegillii go gulahallá eiseválddiiguin, sámi mánáidgárddiid, sámegielatoahpahusa ja gulahallat sámegillii riektevuogádagain ja dearvvašvuođasurggiin. Departemeantta evttoha rievdadit giellahálddašanguovllu njuolggadusaid dainna lágiin ahte bohtet golbma dási suohkaniidda: giellaovdánahttinsuohkanat, giellaealáskahttinsuohkanat ja gávpotsuohkanat. Gulaskuddanáigemearri lea skábmamánu 15. beaivvi 2021. Dáppe gávnnat gulaskuddama:

Gulaskuddan – sámelága giellanjuolggadusaid rievdadusevttohusat

Nubbi dehálaš gulaskuddan lea evttohus ođđa oahpahusláhkii. Láhkaevttohusa 27. kapihttal lea sámegieloahpahusa birra ja das evttohuvvo earret eará addit sámegieloahpahusa rievtti maiddai sidjiide geat eai leat sápmelaččat, muhto geain lea sámegieloahpahus leamaš vuođđoskuvllas. Seammás evttohuvvo maid ahte suohkanat ja fylkasuohkanat galget fállat sámegieloahpahusa sámi birrasis jus gáiddusoahpahus akto ii sihkkarastte ahte sámegieloahpahus lea oadjebas ja dohkálaš. Gulaskuddanáigemearri lea juovlamánu 20. beaivvi 2021. Dáppe gávnnat gulaskuddama:

Gulaskuddan – Ođđa oahpahuslága evttohus ja rievdadusevttohusat friddjaskuvlaláhkii

Sámi giellavahkkus lea maid iežas neahttasiidu. Doppe gávdno prográmma, resurssat ja eará dieđut giellavahkku birra.

Sámi giellavahkku