Olmmošvuoigatvuođalaš suddjen sisabahkkemiidda sámi guovlluin
Raporta birra
Ulbmil raporttain lea buktit eanet dieđu ja máhtu olmmošvuoigatvuođalaš suodjaleami birra sisabahkkenáššiin sámi guovlluin. Deattuhit earenoamážiid artihkal 27 ON konvenšuvnnas siviila ja politihkalaš rivttiid birra (SP 27). Dát raporta čájeha ahte lea leamaš ovdáneapmi sisabahkkenáššiin sámi guovlluin, sámi dilálašvuođat váldojit eanet vuhtii. Seammás lassána sisabahkkennoađđi sámi guovlluin. Rievttálaš suodjalus sisabahkkemiid vuostá álbmotrievtti ja Norgga rievtti mielde ii leat doarvái eastadit ahte ain ođđa guovlluin čađahit sisabahkkemiid ja huksemiid. Lea goitge nu ahte otná suodjaleami haga livčče vel eanet sámi geavahanguovllut manahuvvon. Vaikko ollu sisabahkkemat dohkkehuvvojit, de leat eiseválddit maiddái hilgon soames sisabahkkenohcamušaid negatiivva váikkuhusaid dihte.
Sihke eamiálbmogiid ávnnaslaš vuoigatvuođat ja prosessuála mearrádusat áššemeannudeami birra sisabahkkenáššiin dagahit ahte čađahuvvojit eanet árvvoštallamat, sihke hálddahusdásis ja duopmostuoluin, das movt álbmotrievttálaš suodjaleapmi váikkuha juohke ovttaskas áššái. Eamiálbmogiid ja minoritehtaid olmmošvuoigatvuođalaš suodjaleapmi sisabahkkemiid vuostá lea váldofáddán dán raporttas. Dát riektesuodjalus lea oalle moalkái, ja huksejuvvo máŋggaid iešguđetlágan gálduid vuođul. Dehálaš oassin dán raporttas lea danin leamašan ahte viidát govvidit rievttálaš gova, mii čájeha movt riikkaidgaskasaš mearrádusat dulkojuvvojit riikkaidgaskasaš orgánain, Norgga duopmostuoluin ja hálddahusas.
Panelaságastallan raporta birra
Leat várra gullan Fovsen-ášši birra, mas bieggamillopárkat rihkkot boazosápmelaččaid rievtti doaimmahit iežaset kultuvrra? Makkár olmmošvuoigatvuođasuodjalus lea sápmelaččain sisabahkkemiidda sin boazodoalloguovlluin? Makkár mearkkašupmi lea ON konvenšuvnna artihkkalis siviila ja politihkalaš rivttiid dáin áššiin birra (SP27)? Dáid ja eará gažaldagaid digaštallet Anine Kierulf (NIM), sámediggepresideanta Silje Karine Muotka (NSR), stuoradiggeáirras Ola Elvestuen (G), olju- ja energiijadepartemeanta stádačálli Amund Vik (Bb) ja Johan Strömgren (NIM) min vuosttaš “Olmmošvuoigatvuohtaságastallan šiljus” – sáddagis dán jagi.