ON rávve buot stáhtain galgá leat sorjjasmeahttun orgána mii ovddida ja suodjala olmmošvuoigatvuođaid. Norggas lea Stuoradiggi addán dán barggu Norgga olmmošvuoigatvuohtaásahussii (NIM). NIM lea sorjjasmeahttun, stáhtalaš orgána mii organisatoralaččat lea Stuoradikki vuollásaš. Mis lea váldokantuvra Oslos, ja báikkálaš kantuvra Guovdageainnus, oktiibuot leat mii 20 bargi.
Stuoradiggi ásahii NIM 2015:s NIM-lágain. NIM váldodoaibma lea ovddidit ja gáhttet olmmošvuoigatvuođaid Vuođđolága, Olmmošvuoigatvuođalága ja eará lágaid vuođul ja maiddai internationála traktáhtaid ja álbmotrievtti vuođul. Mii bargat ollu iešguđetlágan olmmošvuoigatvuođaiguin, cealkinfriddjavuođa ja persovdnasuodjaleami rájes gitta hearkkes joavkkuid, nugo dorvoohcciid, álgoálbmogiid, mánáid ja boarrásiid vuoigatvuođaiguin. Min bargu ii leat čoavdit ovttaskasáššiid, muhto váikkuhit fágamáhtuin, vai stáhta eiseválddit sáhttet vuhtiiváldit iežaset olmmošrievttálaš ovddasvástádusa buoremus lági mielde.
Lassin cealkámušaide, earret eará gulaskuddamiid oktavuođas, de mii ovdanbuktit olmmošvuoigatvuođaid ovdáneami birra Norggas ja buktit árvalusaid movt ain buoridit daid diilii min jahkedieđáhusas Stuoradiggái. Mii galgat váikkuhit ja bargat dan ovdii ahte olmmošvuoigatvuođaid čađaheapmi buorrána Norggas. Dan mii dahkat earenoamážit go:
•addit juridihkalaš rávvagiid Stuoradiggái, Sámediggái ja ráđđehussii.
•gozihit olmmošvuoigatvuođaid sajádaga Norggas
•oahpahit olmmošvuoigatvuođaid birra, ja ovddidit olmmošvuoigatvuođaid dutkama
•álbmogii gulahit olmmošvuoigatvuođaid birra
•leat šaldehuksejeaddjin gaskal eiseválddiid ja siviilaservodaga
Dasa lassin mii jámmat raporteret ONa iešguđet olmmošvuoigatvuođalávdegottiide.
NIM jođiha stivra ja direktevra. Min stivrajođiheaddji lea Marit Berger Røsland ja Adele Matheson Mestad lea min direktevra. Min bargiin eatnasat leat juristtat ja stáhtadiehttit geain lea duogáš norgga ja riikkaidgaskasaš duopmostuoluin, akademiijas, áššáskuhttineiseválddiin, stáhtahálddašeamis ja priváhta advokáhttafitnodagain. Min bargiin lea maid vásáhus olgoriikabálvalusas, ON:s ja eará riikkaidgaskasaš ásahusain, politihkalaš bargguin, siviilaservodagas ja medias. Loga eambbo min bargiid birra.
ON internášunala fierpmadat našuvnnalaš olmmošvuoigatvuohta-ásahusaide (GANHRI) goziha ahte našuvnnalaš ásahusat čuvvot earret eará sorjjasmeahttunvuođa ja kvalitehta gáibádusaid mat ovdanbohtet daid nu gohčoduvvon Paris-prinsihpain. 2017 geassemánus attii GANHRI midjiide “A-stáhtusa”, stáhtus mii addo nášuvnnalaš olmmošvuoigatvuohtaásahusaide mat ollásit devdet Paris-prinsihpaid gáibádusaid. Geavatlaččat dat mearkkaša ahte NOÁ oaččui jienastanvuoigatvuođa našuvnnalaš ásahusaid riikkaidgaskasaš ja eurohpálaš fierpmádagas. Dasa lassin oaččuimet čoahkkin- ja hupmanrievtti muhtun ON-čoahkkimiin ja – proseassain olmmošvuoigatvuođasuorggis.