Fovsen-ášši lea dagahan eahpeluohttámuša sápmelaččaid ja eiseválddiid gaskii. Ášši lea maid boktán eanet vaši ja cielaheami sápmelaččaid vuostá sosiála mediain.
Golggotmánu 11. beaivvi lea guokte jagi gollan dan rájes go Fovsen-duopmu celkui. Norgga olmmošvuoigatvuohtaásahus (NIM) lea almmuhan raportta mii analysere olmmošvuoigatvuođamearrádusa man ášši rihkku. Olmmošvuoigatvuođarihkkun ii leat dássážii njulgejuvvon, iige loahpahuvvon. Maid dát mearkkaša? Leat go jođus ođđa olmmošvuoigatvuođarihkkumii? Stáhta lea geatnegahtton njulget olmmošvuoigatvuođarihkkumiid govttolaš áiggis, muhto go dan ii daga, de boađusin sáhttá šaddat ođđa olmmošvuoigatvuođarihkkun.
Ja movt váikkuhit ođasáššit nugo Fovsena birra digaštallamiidda sosiála mediain ja servodagas? Amnesty Norge lea ovttas analysafitnodagain Analyse & Tall geahčadan badjel 200.000 kommentára mat leat čoggojuvvon Facebook-siidduin ja joavkkuin áigodagas ođđajagimánu 2019 rájes geassemánu 2021 rádjai. Ovdagáttut ja negatiiva stereotypiijat sápmelaččaid birra bohtet earenoamážiid oidnosii digaštallamin Fovsena birra.
Semináras áigut dárkileappot čiekŋudit Amnesty iskkadeapmái. Duohtavuođa- ja seanadankommišuvnna raporta, mii almmuhuvvui geassemánus, čujuha Fovsen-ášši ovdamearkan hástalussii mii boazodoalus lea bieggafápmoindustriijain, muhto lea maiddai ovdamearkan áššái mas persovnnalaš muitalusat duođaštit ahte vašši sápmelaččaide ja vaššiságat lassánit. Makkár perspektiivvaid buktá kommišuvnna raporta go ráđđehus galgá čuovvolit Fovsen-duomu?
NIM ja Amnesty Norge sávvet bures boahtima seminárii Fovsen-duomu čuovvoleami birra, mánnodaga golggotmánu 9.beaivvi dii. 09.00-09.45. Seminára lea Diehtosiiddas Guovdageainnus.
Prográmma
09.00: Fovsen-ášši – vejolaš ođđa olmmošvuoigatvuođarihkkun? Johan Strömgren, NIM.
09.10: Logut muitalit: Movt lea leahkit sápmelaš Facebookas? Aili Keskitalo, Amnesty International Norge.
09.20: Makkár perspektiivvaid buktá Duohtavuođa- ja seanadankommišuvnna raporta ráđđehusa čuovvoleapmái Fovsen-duomus? Liv Inger Somby, Sámi allaskuvlla rektor.
09.30: Oktasaš digaštallan Fovsen-duomu čuovvoleamis.
09.45: Čoahkkáigeassu ja loahpaheapmi
Praktihkalaš dieđut
- Čoahkkinlatnja: Diehtosiida kantiinas, Hánnoluohkká 45, 9520 Guovdageaidnu.
- Guossohit gáfe ja gáhku.
- Buohkaide bures boahtin, ii dárbbaš ovdagihtii dieđihit.
- Seminára ii streamejuvvo.