Norgga Alimusriekti cealká ođđa duomus ahte Storheia ja Roana bieggamillohuksemat Fovsenis rihkkot sámiid olmmošvuoigatvuođaid, SP 27 artihkkala vuođul. Ášši oažžu stuora sisriikkalaš ja riikkaidgaskasaš fuomášumi.
Lea historjjálaš mearrádus mas jáhkkimis leat váikkuhusat sullasaš áššiide boahtteáiggis. Lea vuosttaš geardde go nie stuora huksenprošeakta sámi guovlluin lea meannuduvvon alimusrievttis ja dat lea vuosttaš geardi go sápmelaččat vuitet sisabahkkenášši alimusrievttis olmmošvuoigatvuođaid vuođul. Mii áigut digaštallat maid dát duopmu sáhttá mearkkašit sápmelaččaide.
Bures boahtin iđitseminárii Diehtosiiddas bearjadaga golggotmánu 15. beaivvi dii. 09.00 – 09.45.
Prográmma
- 09.00 Fovsen-duomu sisdoallu, Johan Strömgren, NIM guovllukantuvrra jođiheaddji
- 09.10 Sámedikki jurdagat dupmui – Eirik Larsen, Sámediggeráđi politihkalaš ráđđeaddi
- 09.20 Boazodoallofágalaš árvvoštallamat Fovsen-áššis – Issat Heandarat Eira, seniorráđđeaddi Protect Sápmi
- 09.30 Digaštallan. Maid mearkkaša duopmu?
- 09.45 Čoahkkáigeassu ja loahpaheapmi
Praktihkalaš dieđut
- Seminárabáiki: Diehtosiida, Hánnoluohkká 45, 9520 Guovdageaidnu. Čoahkkinlatnja Sullodat.
- Guossohit gáfe.
- Ii dárbbaš dieđihit ovdagihtii, boađe beare seminárii.