Golggotmánu 11. beaivvi lei jagi áigi go Alimusriekti celkkii ahte bieggamillohuksen Storheias ja Roan:is rihkku ON konvenšuvnna siviila ja politihkalaš rivttiid birra (SP) artihkal 27.
NIM fuolastuvvá go jáhkki juo lea gollan iige leat vel Fovsen-ášši olmmošvuoigatvuođarihkkun bissehuvvon. Juovlamánu 13. beaivvi 2021 celkkii Olju- ja energiijadepartemeanta ahte dárbbašuvvo ođastuvvon fágalaš vuođđu vai áššis beassá viidásit. Guovvamánu 2022 evttohedje eaiggádat Roan Vind ja Fosen Vind ođđa čielggadanprográmma evttohusa ja čakčamánu 12. beaivvi 2022 ovdanbuvttii departemeanta evttohusa. Evttohus lea ožžon moaitámušaid boazodolliin geaidda ášši guoskka ja Sámedikkis, earret eará go eai leat konkrehta evttohusat movt bissehit olmmošvuoigatvuođarihkkuma.
Olmmošvuoigatvuođarihkkumin leat stáhtain olmmošvuoigatvuođalaš divodan- dahje njulgengeatnegasvuohta SP artihkkala 2 (3) vuođul. Go rihkkun ain lea doaimmas, nugo dán áššis, lea okta oassi dan geatnegasvuođas bissehit rihkkuma dahje doaimma. Eará vuogit sáhttet leat buvttadusat, eará njulgen-/divodandoaimmat dahje šállošeamit jnv. NIM lea departementii čállán cuoŋománu 1. beaivvi dan jagi ahte eiseválddiin lea njulgen-/divodangeatnegasvuohta Fovsen boazodolliide. NIM oaivvilda ahte ođđa čielggadeamit Fovsen boazodoalu birra ii sáhte šaddat vuostálasvuohtan geatnegasvuhtii bissehit SP artihkkala 27 rihkkuma dán áššis nu jođánit go vejolaš. Go SP lea ovttastahtton olmmošvuoigatvuođaláhkii, de lea maid artihkal 2:ža (3:ža) divodan- ja njulgengeatnegasvuođa birra ollislaččat oassin Norgga rievttis.
NIM oaivvilda departemeanta farggamusat ferte evttohit čovdosiid mat vuhtiiváldet boazodolliid olmmošvuoigatvuođaid. Lassin dasa oaivvilda NIM ahte ráđđehus ferte árvvoštallat njuolggadusaid ja práksisa vai sihkkarastet ahte sullasaš olmmošvuoigatvuođarihkkumat eai dáhpáhuva nuppes.
Suoidnemánu 1. beaivvi doaibmagođii ođđa rabasvuođaláhka. Dat geatnegahttá stuorebuš fitnodagaid “čielggadit ja árvvoštallat vejolaš ja duohta negatiiva váikkuhusaid olmmošvuoigatvuođaide” ja “bidjat johtui dohkálaš doaibmabijuid bissehit, eastadit dahje unnidit negatiiva váikkuhusaid”, gč. § 4 b- ja c- čuoggáid. Dat árvvoštallamat galget almmuhuvvot, gč. § 5.
Dan olis NIM vuordá gealdduin fitnodagaid várrogasvuođaárvvoštallamiid ja sin plánaid dohkálaš doaimmaide go galget čuovvolit Fovsen-duomu.
Loga maid main raporta fátta birra: